උසාවියෙන් ඇසුනා

අල්ලස් දීලා නඩු දිනාගන්න පුළුවන් කාලයක් එංගලන්තයෙත් තිබිලා තියෙනවා.  මේ බව කියලා තියෙන්නේ ශ්‍රීමත් ගාවි රෙන්ටුල් නම් මහේස්ත්‍රාත්තුමා විසින් ලියපු  “sometimes I think”නම් ග්‍රන්ථයේයි.  මේ කාලය ගෙවී ගියාට පස්සෙත් ඒ බව නොදැන එක්තරා මහළු ගොවියෙක් නඩුකාරතුමෙකුට අල්ලස් දීමට යාමේදී බිහිවූ හාස්‍ය ජනක කතාවක් පිළිබදව සදහන් වෙනවා. ඔන්න ඒ කතාව මෙහෙමයි.

නඩුව විභාගයට ගන්නට දින කිහිපයකට පෙර ඉහත කී මහළු ගොවියා තමා වෙනුවෙන් පනී ඉන්න නීතීඥවරයා හමුවෙන්නට ගියා.

 

“මහත්තයෝ නඩුව දිනාගන්න නම් හොද ක්‍රමයක් තියෙනවා...

“ඒ මොකද්ද? නීතීඥවරයා ගොවියාගෙන් කුතුහලය දැනවූ පැනය ඇසුවා.

“අපි නඩුකාරයාට තාරාවෝ ටිකක් යවමු..... ඒ පාර නම් නීතීඥතුමාගේ ඇස් දෙක විතරක් නෙවෙයි කටත් ඇරුනලු.

“පිස්සුද අයිසේ????? නීතීඥ තුමා තැතිගත් ස්වරූපයෙන්ම පැවසුවා. “එහෙම දෙයක් හීනෙකින්වත් හිතන්නවත් එපා.  තමුසෙගේ නඩුව පරාදවෙන්න  මොනවාම හරි දෙයක් කරගන්න තියෙනවා නම් ඒකට හොදම දේ තමා ඔය නඩුකාරතුමාට පගාව දෙන්න හදන එක.   ඉතින් තමාට කරපු අනතුරු ඇගවීම ඉතාමත්ම නිහතමානීව පිළිගෙන මේ ගොවි මහත්තයා නීතීඥ කාර්යාලයෙන් පිටවෙලා ගියාලු. 

පසුව මේ නඩුව විභාගයට ගත්තා.  මහළු ගොවියා නඩුවෙන් දිනුවා.  උසාවියෙන් එළියට එමින් සිටි ගොවියාට ඔහු වෙනුවෙන් පනී හිටපු නීතීඥතුමා ජයග්‍රහණය ගැන තමන්ගේ සතුට පළ කලා. 

“මම හිතුවා මම නඩුව දිනනවාමයි කියලා......ගොවියා සිනාසුනේ තමන්ගේ එක් ඇසක්ද වසා සිනාසෙමිනුයි.  “ඔබතුමා කොහොම කිවුවත් මම නඩුකාරයට තාරාවෝ ටිකක් යැවුවා.

“මොකක්????

“මම අර තරම් එපා කියලත් තමුසේ මාර මිනිහෙක්නේ.  නඩුකාරතුමාට තාරාවෝ යැවුවද?

“ඔව්... ගොවියා උත්තර දුන්නා.  “හැබැයි මම තාරාවෝ යැව්වේ මගේ විරුද්ධකාරයා යවන විදියට එයාගෙ නමිනුයි...

“ඔහ්හෝ....එහෙනම් ඒකයි මේ!!!!  ගොවියාගේ කපටි මොළය හා නඩුකාරතුමාගේ හැසිරීම් රටාව නීතීඥතුමාට තේරුම් ගියේ එවිටයි.

...................................................................................................................................................................................................

උසාවියේදී කොතරම් දිවුරුම් දුන්නත් හැමෝම ඇත්ත සාක්ෂි දෙන්නේ නැහැනේ.  ඒක ඉතින් ලෝකෙ කොහෙත් එකම විදිය තමයි.  මම අර ඉහතින් සදහන් කල ග්‍රන්ථයේ ඒ බව සදහන් වෙලා තියෙනවාලු.  ඉතින් මේ විදියට නඩුවක් විභාග කරන්නට යෙදුනු අවස්ථාවේදී සාක්ෂි කූඩුවට නැගුන එක්තරා සාක්ෂි කරුවෙක් දිවුරුම් දුන්නා තමන් කියන්නේ සත්‍ය කරුණු බවට.  නමුත් ඔහු කියන්නේ අසත්‍ය ප්‍රකාශයක් බව විනිසුරුවරයාට තේරුම් ගොස් තිබුනා.

“තමා ඔය කියන කරුණු සියල්ල ඇත්තද?  විනිසුරුතුමා සාක්කිකරුගෙන් ඇසුවේ අවවාදයකුත් දෙන අතරතුරමයි.  නමුත් සාක්ෂි කරු බොහෝම තැන්පත් හඩින් කියා සිටියේ

“මම සත්‍ය සමග අතිනත ගත්තේ ඉතා ලාබාළ අවධියේදියි ස්වාමිනී....

“සත්‍ය සමග තමා අතිනත ගත්තේ ඉතා ලාබාළ අවධියේ වෙන්න පුළුවන්.  ඒත් කවද්ද තමන් දික්කසාද වුනේ? විනිසුරුතුමා ඇසුවේ මුළු සභාවම සිනා සයුරේ ගිල්වමිනුයි.

.................................................................................................................................................................................................

තවත් නඩුවකදී ඉතාමත් කටකාර කාන්තාවක් උසාවියේදී නඩුවකට පෙනී සිටියා.  ඇය ඉතා උස් හඩින් කියූ දේ සත්‍ය නොවන බව මනාව අවබෝධ වෙමින් තිබුණා. 

“තමුන් දන්නවද දිවුරුම් දීලා සාක්ෂි දෙනවයි කියන එකේ තේරුම?  විනිසුරුතුමා මේ කාන්තාවගෙන් ඇසුවා.

“මන් දන්නේ නැද්ද ස්වාමීණී, අපි මාළු මාකට් එකේ මිනිස්සුනේ.  ගැහැනිය කිසිම ගණනකට නැතිව කීවා.

(උසාවියේ තොරතුරු තව ටිකක් විතර තියෙනවා. ඉතිරිය හෙට කියන්නම්කෝ.  ගිහින් එන්නම්)