Saturday, January 9, 2016

2016 සැමට සුබ නව වසරක් වේවා!!!!

හා හා පුරා කියලා 2016 වසරේ මුලින්ම ආවේ ඔන්න අද තමයි.  ඒ තරමට වැඩ. මේ වසර සැමට සුබදායී වසරක් වෙන්න කියලා පතනවා. 

නිදහසේ මොනවත් ලියන්න කියන්න හිතන්න වැඩිපුර ඉඩක් නැහැ.  ඒකට හේතුව අපේ ගේ ගාව සැණකෙළියක් , එහෙම නැත්නම් කානිවල් එකක් තියෙනවා දැන් දවස් ගානක් තිස්සේ. ඉතින් ඒකේ සද්දේ කණ පැළෙන්න තරමට.

අපිත් ඒ පැත්තේ ගියා ඊයේ.  ගියාට මොකෑ ඒ හැටි දෙයක් නැහැ. මාත් ඉතින් හා හා පුරා කියලා ඔය කානිවල් එකක් බලන්න ගියාම තමයි.  ඒ වුනාට ගියාට පස්සේ හිතුනා මේ මොන මගුලක් ද කියලා.  ඇතුල්වීමට රු.100ක් වැඩිහිටියෙකුගෙන්. පොඩි අයට 50ක්.  ඒකත් කමක් නැහැ කියමුකෝ. තියෙන හැම එකකටම රු. 100 ගානේ එක්කෙනෙක් ගෙන් අය කරනවා.  ඉතින් ඒක හැමෝටම එක විදියට දරාගන්න අමාරු ගානක්නේ.  ඒ ගණන සහනදායි එකක් වුනානම් හොදයි කියලා හිතුනා.

 සංගීතයක් තියෙනවා කියපු නිසා ඒක බලන්න හිටියා.  ඒත් කියපු කවුරුවත් 12 වෙනකන් ආවේ නැහැ.  තරුණ ගැටවු , කෙළි පොඩ්ඩන්ට ඇහැ දාගෙන ඉන්නවා හැමතැනම.  ඒත් ඒ හැම කෙනෙක්ගෙම වගේ ඇස් බාගෙට පියවිලා.  අනේ ඉතින් දහදුක් විදලා දරුවන් උස් මහත් කරන්නේ මේකටද කියලා හිතුනා.  බොහෝම තරුණයන් මත්වෙලා හිටියේ.  ඒත් අරක්කු වගේ දෙයක් පානය කරලා කියලා හිතන්න පුළුවන් කමක් තිබුනේ නැහැ. 

තත්වය හැමතැනකම මේ වගේ තමයි.  කොහොම වුනත් අනාගතේදි කෙල්ලෙක්ට කසාදයක් කරගන්න හරිහමන් කොල්ලෙක් ඉතිරි වෙලා හිටියොත් ඇති නේද?.  කෙල්ලෝ ගැන හිතුවත් වැඩිපුර වෙනසක් නැහැ. මොක වුනත් අනාගත පරපුර කොයිබටද? කියලා හිතුනා.

පොඩි බහින්බස් වීමක් ඇහෙන කොටම පොලිස් ඇත්තෝ ඒ තැනට සේන්දු වුනා.  අපිත් හිමින්ම ගෙදර ආවා.  ඕං ඔහොමයි මං බලන්න ගිය කානිවල්!!!!!!

Monday, December 14, 2015

ඇත් පොර

ඔය ඉස්සර කාලේ රටේ රජ්ජුරුවොයි මහා ජනතාවයි බලාගෙන ඉද්දිම වල් ඇතුන් හා හීලෑ ඇතුන් පොරට යවන සිරිතක් මහනුවර රාජධානි කාලයේ පැවතියාලු.  එය විනෝද ක්‍රීඩාවක් විදියටයි හැමෝම සලකලා තියෙන්නේ.  පොරට යවන්න හොද වල් ඇතුන් රැක්ම ලා මහ වනයේ ඉදන් රජ වාසලට ලගින් පිහිටි ඉඩමකට රැගෙන විත්, හීලෑ ඇතුන් එක්ක පොරට යවනවලු.

කොහොම හරි මේ පොරට ගන්නා ඇතා ඇරෙන්න අනෙක් සියලුම ඇතුන් ගාල් කරලාලු තියෙන්නේ.  මේ විදියට ඇත් පොර කිහිපයක්ම සිදු වෙනවා.  මේ ක්‍රීඩාව නරඹන්නත් විශාල ජනතාවක් රැස්වෙනවාලු.  කොටු කරපු විශාල භූමි භාගයක් අවට ඉදන් රජතුමා සමග ජනතාවත් ඇත් පොර නරඹනවා.  හැබෑවටම කියනවානම් මෙය ජනතාව තැතිගන්වන සුළුයි.

මේ විදියට රාජාධි රාජසිංහ රජුගේ කාලයේදී ඇත් පොරයක් සංවිධානය වුනා.  විශාල වල් ඇත්තු එක්ක පොරයට රජුගේ ඇත් ගාලේ හිටපු ඇතෙක් ඉදිරිපත් කලා.  ඉතින් මේ ඇත් රාජයෝ දෙදෙනාම හොඩවැල පටලවා ගනිමින් විවිධ ශබ්ද නගමින්, එකිනෙකාට පහර පිට පහර දෙමින් පොරය ආරම්බ වුනා.  බොහෝ වේලාවක් සටන් කලත් මේ දෙදෙනාගෙන් එකෙක් වත් පැරදුනේ නැහැ.

අන්තිමේදී රජුගේ ඇත් වල් ඇතාට බොහෝම තද පහරක් එල්ල කලා.  එය කොතෙක් සැර පහරක්ද කියනවා නම් වල් ඇතා විසිවෙලා ගිහින් හැටි ගන්න හාරපු වළකට වැටුනා.  මේ දැකපු මහජනතාව ඔල්වරසන් දෙන්න පටන් ගත්තා.

රජ්ජුරුවෝ තමන් ළගම වාඩිවෙලා සිටි ගලගොඩ නිලමේට කථා කරලා මේ දැන් සිදුවුන සිදුවීම ගැන කවියක් කියන්න කියලා කිව්වා.  ඉතින් නිලමේ පැරදුනු ඇතා කියනවා වාගේ ඒ වෙලාවෙම  මේ කවිය කිවුවා.


ඉන්නා විලස ඉන්ටත් මට නොදී           කැලේ
පන්නා ගෙන ඇවිදින් මොන හොදද       කලේ
දන්නා තරම පොර ඇන්නෙමි වඩා ලො     ලේ
ඇන්නෑවේ වැටුණෙමි මැටි ගත්තු ව           ලේ

මේ කවිය ඇසුවාම රජුට ඉමහත් සතුටක් දැනුනා.  ඉතින් රජු නිළමේට තැගී බොහෝමයක් පිරිනැමුවා.